Mayor Gullas daghan og nakat-onan sa bagyong Odette
CEBU, Philippines — Giangkon ni Talisay City Mayor Gerald Anthony “Samsam” Gullas nga daghan gyud siya og nakat-onan sa dihang miigo ang bagyong Odette dili lang sa Talisay kondili hasta sab sa kasinatian sa uban pang lugar sa probinsya.
Siya nagkanayon nga una niyang nakitang kinahanglan dayong mahatag mao ang mga generators sa mga tunghaan ug ubang ahensya sa gobiyerno aron di madelatar ang serbisyo nga ihatag sa nagkinahanglan.
Asoy pa sa mayor nga ang dokumentasyon mao sab ang gikinahanglan aron mahibawo sa kinatibuk-ang epekto sa katalagman.
Ang bagyong Odette nisumad kagahapon (Disyembre 16) ug wala makalikay si Gullas sa paghandum niini ug unsa nasab ang ilang nahimo sa pagbangon sa panghitabo. Matud pa niya nga dili lang kahoy ug poste ang nangatumba niadtong panahona kundi lakip na ang kalipay ug paglaom nga makasaulog sa pasko nga bulahan.
Apan ang kaisog sa pagsungasong sa Talisaynon nga makapadayon sa inadlaw nga hagit maoy iyang nakita hangtud nga nakabangon.
“Nakabangon kay nagtinabangay. Mao kana atong ikalipay ug ipasalamat as we commemorate the anniversary of a tragedy that tested us all,” sigon pa ni Gullas. (BANATNEWS)
- Latest
