Street parties, konsiyerto estriktuhon

CEBU, Philippines —  Mas esktrikto na karon ang siyudad sa pag-isyu og permits niadtong mga gustong magpahigayon og concerts ug street parties sugod karong buwan sa Disyembre hangtud na sa Sinulog sa bulan sa Enero sa sunod tuig.

Si Police Lt. Col. Janette Rafter, Deputy City Director for Operations sa Cebu City Police Office kinsa apil sa mga opisyales nga nagtigum alang sa umaabot nga mga selebrasyon sa siyudad miingon nga mao kini ang mga kausabang ipatuman. Mas estriktohon na ang pag-monitor sa mga application sa permits, kinahanglan mohimo una og safety ug validation sa tanang mga isumetir nga dokumento sama sa security ug contingency plans sa mga organizers subay sa venues kun diin nila kini planong himuon.

“Mas okay gyud siya, nindot siya nga ingon to avoid panghitabo nga mga nangagi tungod pud niining kalingawan naay mga nangakalas nga kinabuhi in order to avoid to that atleast maximum prevention nga dili na mausab ang kato nga panghitabo, moagi og evaluation ang ilang mga permits among the security and safety cluster sa LGU,” asoy ni Rafter.

Karong umaabot nga Sinulog, girekomendar sab nga wala gyuy street parties ug ipatuman ang gun ban  aron pagsiguro ang seguridad sa selebrasyon.

Samtang tukionon pa ang mga sugyot nga total liquor ban atol sa kapistahan sa Senyor Sto. Niño nga daghan na daang mi-alma ilabi na niadtong mga lugar nga dili apil sa rota sa Sinulog Grand Parade ug prosisyon.

Si Konsehal Phillip Zafra, ang Chairman sa Peace and Order ug  Sinulog Executive Committee (SEC) sa konseho sa siyudad miingon nga bisan og dili na sa kaniadto Sinulog grand parade route himuon ang street dancing dili gihapon tugotan ang street parties sa maong mga lugar.

Ang rota sa Sinulog anha na pagabuhaton sa South Road Properties mao nga ang kaniadto rota siguradong dili na sama ka alegre sa nangaging mga Sinulog.

Sumala pa ni Zafra, gikan sa Sabado sa prosisyon ngadto na sa pista sa adlaw nga Domingo, tanang mga kalihukan adto ra gayud himoon sa SRP.

Ang tumong niini nga didto matutok sa kapolisan ang bantayanan ug dili sila mabahin-bahin.  Usa kini sa rason nganong did-an ang street parties, usa sab sa gilikayan ang stampede ug ingon man ang karambola na sab sa mga batan-ong mangahubog.

Si Zafra gikatakda pang moduso og resolusyon bahin sa maong mga rekomendasyon isip pangulo sa peace and order sa konseho ug iduso usab niya kini kang Mayor Michael Rama aron modesisyon kun moisyu kini og executive order bahin niini.  Gawas pa niini, hugot sab nga gibantayan sa kapolisan ang pagkatap sa party drugs nga sagad anha ipamaligya atol sa mga konsiyerto ug mga street parties.— Rowena Capistrano/IBM (BANAT NEWS)