4 ka centenarians nakadawat og insentibo gikan sa Kapitolyo

CEBU, Philippines — Upat ka centenarians sa mga lungsod sa segundo distrito ang gihatagan og pasidungog sa Probinsya sa Sugbo atol sa gihimo nga caravan of services sa Kapitolyo didto sa lungsod sa Oslob.

Sila si Teopista Famat sa Brgy. Tulic, Argao; Prudencia Rodriguez sa Brgy. El Pardo, Boljoon; Genoviva Yatan sa Brgy. Cangcaya, Alcoy; ug Leodegario Labastida sa Brgy. Pugalo, Alcoy nakadawat og tag P100 mil nga insentibo gikan sa Probinsya sa Sugbo.

Silang upat gipanganak sa tuig 1922, kon diin si Lola Teopista maoy kinamagulangan human nga gipanganak niadtong Septiyembre sa maong tuig samtang ang tulo natawo sa bulan sa Oktubre.

Si Gobernador Gwendolyn Garcia maoy personal nga nitunol sa maong insentibo sa mga centenarians ug nipadayag og pagpasalamat ngadto sa mga senior sa pipila ka tuig nga paningkamot niini alang sa ilang pamilya ug komunidad.

Mapasigarbohon si Garcia nga iyang nakatagbo ang upat ka centenarians kon diin nakadawat pud sila og bag-ong wheelchairs, food packs, vitamins ug uban pa gikan sa Kapitolyo, DILG ug DSWD niadtong Disyembre 1, 2022.

Ang Republic Act 10868 o ang Centenarian Act of 2016 nagmando sa gobyerno nga hatagan og “centenarian gift” ang mga Pinoy nga makaabot og 100 years pataas og hatagan og incentive. (BANATNEWS)