Pamilya sa mga doctor mipahigayon og medical mission

CEBU, Philippines — Pamilya sa mga medical doctor nga gipanguluhan sa ilang amahan nga si kanhi retired DOH-7 supervisor Dr. Expedito Medalla mipahigayon og medical mission diha sa lungsod sa San Fernando niadtong Domingo.

Suma ni PJ Medalla ang anak niini nga usa ka nurse nga naandan na kini sa ilang pamilya nga mopahigayon sa kalihukan isip pag tabang sa mga taga San Fernando nga wala naka pa check-up og doktor tungod sa pandemic.

Lakip sa napahimuslan sa 500 ka mga tawo mao ang libreng check-up sa mata, cholesterol, sugar, Blood Pressure, paibot ug limpyo sa ngipon.

Niadtong miaging buwan mipahigayon usab sila og operation tuli sa bukirang barangay sa San Fernando.

Matud ni PJ Medalla nga anaa sab ang walo ka mga dentist nga nitabang sa pag-atiman sa  dunay problema sa ngipon ilabi na ang mga bata nga na pundo sa panimay tungod sa health protocol sa gobyerno.

Gipahibawo ni Medalla nga dili tanan tawo nga gusto magpa ibot sa ilang ngipon ang naka avail sa dental services tungod kay ang uban taas ang Blood Pressure sama sa mga senior citizen tungod kay kini makaapekto sa ilang pitik sa kasing-kasing nga mo resulta sa heart attack.

Nakadawat usab og mga tambal ang mga nagpakonsulta pinaagi sa mga volunteer nga mga Med-Rep nga nanghatag sa ilang mga free sample nga mga tambal.

Gidapit usab ni Medalla ang taga San Fernando nga bukas ang ilang clinic nga anaa mahimutang sa usa ka pribadong ospital sa Naga nga pwede ra kaduolan kung nanginahanglan og konsulta.

Tinguha sa pamilyang Medalla nga ipadayon ang ilang nasugdan na nga medical mission sa kada quarter matag tuig, ilabi na ang buwan sa kapyestahan ni Senior Sto. Niño. (BANATNEWS)