Mga residente sa Opra nireklamo sa kahitak sa karsada

CEBU, Philippines —  Sa ikaduhang higayon gihunong na usab ang pagtrabaho sa road concreting project diha sa Barangay Kalunasan, Dakbayan sa Sugbo ilabi na diha sa Opra area.

Base sa taho sa Cebu City Public Information Office nga adunay pipila ka residente sa maong dapit ang wala malipay gumikan kay dili sayon ang pag-agi sa karsada ug adunay mga higayon nga bahaon kini kon mobunok ang uwan.

Gikataho nga daghang motorsiklo ang nangalamba diha sa maong dapit gumikan sa kahitak sa dalan.

Sa pagsusi sa information office sa siyudad giingong wala nay nagtrabaho sa karsada. Nasayran nga ang Docast Construction maoy contractor sa nahisgutang proyekto.

“Ang tubig diha kong mag-uwan babaw sa kiting nato unya dili man makita sa mga motorista nga lawom imong maagian mao na daghang nangalamba diha unya ang tubig mo awas ari na paingon sa amoa”, matud sa usa ka residente sa lugar kinsa nagdumili sa pagpahingan.

Nasayran nga gisugdan og trabaho karong tuiga ang karsada apan kalit lang gihunong sa contractor ang trabaho.

Ang maong P23.8 milyones nga proyekto gisugdan niadtong Enero 22, 2022 ug niadtong  Hunyo 19, 2022 ang gitakda nga pagkahuman niini .

Ang habig sa contractor padayong gipaabot sa mga tigbalita.

Si Cebu City Councilor Jerry Guardo nipadayag nga gipatawag na nila ang contractor ug aduna lang kini giproseso alang sa partial payment nga kolektahon niini gikan sa kagamhanan sa siyudad.

Dugang ni Guardo nga giproseso na ang mga dokumento sa contractor diha sa accounting office ug gilaoman nga mapadayon na ang pagtrabaho sa road concreting project diha sa Opra. - Caecent Noot-Magsumbol