Kapolisan, opisyales sa barangay ug project director nagtagbo

CEBU, Philippines — Nagtagbo kagahapon ang mga chief of police sa Cebu City Police Office, mga barangay official ug ang project director sa Christmas City Project Bernard Ricablanca ug gituki ang mga lugar diin adunay mga gipamutang nga Christmas decorations aron mabantayan.

Kini human pipila sa mga Christmas decoration nga gipamutang sa kagamhanan sa Siyudad sa Sugbo nga buksan unta sa sunod buwan ang gipanangtang ug gipangkuha.

Ang maong mga decoration gibutang subay na tinguha sa siyudad nga “Christmas City” diin pipila sa mga skywalk, center islands ug mga nag-unang kadalanan sa siyduad ang gibutangan og dekorasyon ug gipasigaan og mga nindot nga mga ornamento.

Apan ang Christmas decors nga gibutang diha sa Osmeña Boulevard ang gikuha pila ka adlaw human kini nakompleto og butang ug kinahanglan na usab kining hulipan og bag-o.

Gumikan sa maong hitabo nangayo og tabang si Ricablanca sa Cebu City Police Office aron mabantayan ang mga dekorasyon.

Subay niini, si Police Lieutenant Colonel Wilbert Parilla, deputy city director for administration sa Cebu City Police Office nagpatabang sa opisyales sa barangay ilabi na sa mga tanod aron matan-aw ang lugar ilabi na nga gamay na ang tawo diha sa area.

“Mao ni atong hangyo sab sa kapitan nga magpatabang ta kay considering sab nga daghan na kaayo ta og activities then most of our personnel ma-deploy sa nagkalain-laing mga security”, padayag ni Parilla.

Gisubay sa kapolisan ang posibilidad nga ang naghimo niini mga batan-on nga moagi sa dapit unya nag-tripping sa pagkuha sa mga dekorasyon.

Matud ni Parilla nga ang masakpan nga naghimo sa maong kalapasan pwedeng mapasakaan og kasong damage to property ug kong adunay nangawala pwede usab mapasakaan og kasong theft. (BANATNEWS)