Problema sa malnutrition gihatagan og solusyon

CEBU, Philippines — Gipaabot nga matubag na ang problema sa malnutrition sa mga barangay dinhi sa Dakbayan sa Sugbo nonot sa giduso nga programa sa Philippine Association of Nutrition Incorporated ngadto sa mga barangay nutritionists.

Una nang gikatahu nga mokabat sa 2,888 ka bata ang gikonsiderar nga malnourished, segun sa Operation Timbang Plus 2022 Report sa Cebu City Nutrition Council.

Aron paghatag og kasulbaran sa problema, ang barangay nutritionists nagtigum alang sa Barangay Nutrition Action Officers Forum”.

Ang mga barangay nutritionist gihatagan usab og orientation sa “Monitoring and Evaluation of Local Level Plan Implementation Protocol” (MELLPI-Pro) usa ka computer program monitoring tools diin ang mga barangay nutritionist mobutang sa mga data ug mohatag og mga report bahin niini.

Suma pa ni Piladelfa Gaviola sa Philippine Association of Nutrition Inc., nga ang National Nutrition Council maoy nagduso alang sa pag-umol sa MELLPI-Pro aron dunay sistema sa pag-evaluate og data, ilabi na sa malnutrition assessment.

Lakip sa mga importante nga butang sa MELLPI-Pro system mao ang evaluation sa pag-implementar sa mga barangay sa nutrition laws and policies, paghatud sa mga serbisyo og pag-ila sa mga matang sa nutritional interventions nga ilang gihimo.

Ang Cebu City Nutrition Office nangulo usab sa nutrition awareness campaign nga gitambongan sa mga barangay nutritionists sa 80 ka barangay sa siyudad.

Ang CNO mao usab ang mogiya sa implementasyon sa ilang mga serbisyo apil na ang mga pamaagi aron pakigbatokan ang manutrition.

Suma pa ni Emma F. Sevilla sa City’s Nutrition Office (CNO) nga ang pagtukod sa ilang kaugalingon nga opisina dinhi sa siyudad makatabang sa mga barangay sa pagpatuman sa ilang tagsa tagsa ka nutrition programs.

“Ayaw lang gyud mo og kaikog kay naa ra mi motabang ug maghimo ug mga programa para sa kaayohan sa atong siyudad,” segun ni Sevilla. —The Freeman