Bag-ong chairman sa RDC-7 nanumpa na

CEBU, Philippines — Pormal na nga nanumpa si Bohol Governor Erico Aristotle “Aris” Aumentado isip bag-ong chairman sa Regional Development Council (RDC)-7 human sa ilang gipahigayon nga Provincial Development Council.

Si Aumentado uban sa iyang asawa nga si Kongresista Maria Vanessa nanumpa kang Regional Trial Court (RTC) Judge Jennifer Marcos. 

Ang maong kalihokan gipahigayon didto sa Bohol Provincial Capitol Ceremonial Hall nga nahimutang sa Barangay Cogon, Tagbilaran City kagahapon sa buntag.

Si Aumentado gitudlo ni Presidente Ferdinand “Bongbong” Marcos, Jr. isip chairman sa RDC-7. Matud ni Aumentado nga dako ang iyang pasalamat sa presidente sa pagpili kaniya sa maong katungdanan bisan og bag-o lang siya nagsugod sa iyang termino apan gihatagan gihapon siya og maayong higayon aron maserbisyohan ang katawhan sa rehiyon- 7.

Si Aumentado nagkanayon nga dili sayon nga position nga iyang gihuptan tungod kay naglangkub kini og dugang responsibilidad kaniya apan pinaagi sa tabang sa mga kaubanan niyang opisyales sa LGU ug sa mga miyembro sa RDC-7 ilang mapatuman ang nagkadaiyang kalihokan sa paglambo sa rehiyon.

Si Aumentado nisunod kini sa lakang sa iyang amahan nga si kanhi Gobernador Erico Boyles Aumentado kinsa nahimo usab nga kanhi chaiman sa RDC-7.

Gipasalig usab ni Aumentado nga patas ang paghatag niya og pagtagad sa tanang proyekto sa rehiyon ug dili lang sa iyang kaugalingon nga probinsya.

Gibutyag ni Aumentado nga nahinabi na usab niya ang mga gobernador sa mga Probinsiya sa Cebu, Negros ug Siquijor human kini nipadangat sa ilang panimbaya.

Ang RDC-7 mopahigayon sa ilang full council sa sunod buwan human molingkod na si Aumentado isip chairman uban sa iyang opisyales. (BANATNEWS)