Partylist nisuporta sa balaodnon ni Rama
CEBU, Philippines — Gibutyag sa representante sa Tutok To Win Partylist Kongresista Sam Verzosa nga suportahan niya ang mga balaodnon nga giduso ni Kongresista Eduardo Rama sa Cebu City South District .
Matud ni Verzosa nga nakita niya ang pagkamahinungdanon sa mga balaodonon ni Rama diin pipila niini mao ang planong pagpausbaw sa suholan sa mga pampublikong magtutudlo ingon man ang pagpatukod dinhi sa Sugbo og kidney institute.
Nagkahimamat sila si Verzosa ug Rama atol sa pagbukas sa Front Row Cebu nga gipanag-iya sa nahiuna.
Nagkanayon si Verzosa nga importante kaayo alang sa katawhan ang maong mga balaodnon ni Rama.
Ang pag-umol og kidney institute sa Cebu magsilbing ikaduha nga pasilidad alang sa maong katuyoan diin ang una niini toa nahimutang sa kaulohan.
Si Rama nipadayag sa iyang kalooy ngadto sa ubang pasyente tungod kay makagasto kini og dako sa hemodialysis session ug ang mga pasyente kinahanglang mopaubos niini sa labing menos tulo ka sesyon matag semana.
Giingong pinaagi sa kidney institute mamenosan na ang gasto sa mga pasyente.
Niduso usab og balaodnon si Rama alang sa pagpausbaw sa sweldo sa public school teachers gikan sa P25,439.00 o salary grade (SG) 11 ngadto sa P41,508.00 o SG 17.
Ang House Bill (HB) 4608 nailhan usab isip “Public School Teachers Salary Increase Act”.
Gawas sa maong pagpausbaw sa sweldo gitinguha usab ni Rama ang tinuig nga P8,000 nga teaching supplies allowance ug P10,000 nga medical examination ug treatment allowance alang sa mga magtutudlo. (BANATNEWS)
- Latest
