NGOs magbutang og trash-for-cash sites sa Cebu City

CEBU, Philippines — Ang problema sa segregation ug hustong paglabaya sa basura sa Dakbayan sa Sugbo ang gilaomang mokunhod na kini gumikan sa pagbutang og ‘trash-for-cash sites” diha sa nagkalain-laing lokasyon sa siyudad.

Ang maong programa ubos kini sa pagtambayayong  sa kagamhanan sa siyudad,  Friends of Hope ug Green Cycle nga parehong Non-Government Organizations.

Si Ylusian Farias, managing director sa Friends of Hope nakigtagbo na kini kang Mayor Michael Rama diin ilang gituki ang kalabotan sa proyekto.

Si Farias nagkanayon nga gusto nila nga makig-partner sa kagamhanan sa siyudad tungod kay nasayran nila nga ang paglahi-lahi sa mga basura maoy usa sa mga problema niini sa taas na nga panahon.

Ang mga basura usa usab kini sa mga hinungdan sa problema sa baha tungod kay nakabara kini sa mga agianan sa tubig.

Ang site magsilbi kining aggregation hub diin ang mga sakop sa komunidad anha mobaligya sa ilang mga basura nga plastik.

“With this, bystanders or the community, in general, will become empowered not only to depollute the environment but make extra income as well”, matud ni Farias.

Ang Friends of Hope nagplano sa pagbutang og 50 ka “Aling Tindera” sites sa palibot sa siyudad apan gihagit sila ni Rama nga magbutang og 300 ka sites.

Matud ni Farias nga ang grupo makatuman sa maong gidaghanon apan kinahanglan nga ang siyudad mohatag kanila og mga lugar alang sa maong programa.

Si Rama nidestino kini sa iyang staff nga si Reymarr Hijarra ug Atty. Jade Ponce sa pag-identify sa posibleng site nga butangan sa Aling Tindera. (Gikan sa The Freeman/BDB)(BANAT NEWS)