Manag-uyab padung mag-camping naaksidente
CEBU, Philippines — Manag-uyab nga padung mag-camping, nasampak sa concrete barrier sa Trans-Central Highway sa Brgy. Cansumoroy sa Lungsod sa Balamban niadtong Sabado sa gabii.
Nakalas sa maong aksidente si Jason Sayson, 24, taga Brgy. Babag, Dakbayan sa Sugbu, trabahante sa usa ka hospital sa dakbayan sa Sugbu.
Samtang grabeng naangol ang iyang uyab nga si Ma. Catrina Tampus taga Ormoc City.
Matud pa ni Police Lt. Col. Glenn Hife, hepe sa Balamban Police Station ang mga biktima sakay sa ilang motorsiklo paingon sa Lungsod sa Balamban.
Samtang nagdulhog sa kurbadahong bahin sa maong highway diha sa Cansomoroy kalit nga nag-malfunction ang brakes sa motorsiklo.
Gikatahong nawad-an og kontrol sa manobela si Sayson ug gibangga niya sa concrete barrier sa pangpang ang motor aron sila mahunong sa pagdagan. Apan gumikan sa kakusog sa pagbangga, nalagpot si Sayson ug nakaangkon og grabeng kadaut sa kalawasan, patay na kini pagabot sa tambalanan sa Balamban. Samtang ang uyab niini nga si Tampus, talandugon ang kahimtang.
Sumala ni Hife nga ang mga biktima adunay dala nga tent ug gituohang padung sila mag-camping dihang nahitabo ang aksidente. — /IBM (BANAT NEWS)
- Latest
