26 ka eskwelahan sa Minglanilla nakadawat og two-way radio

CEBU, Philippines — Ang Local Government Unit sa Lungsod sa Minglanilla nanghatag og two-way radio diin 26 ka eskwelahan sa lungsod ang nakadawat niini kagahapon.

Ang turnover gipahigayon diha sa buhatan sa mayor pinaagi sa Municipal Disaster Risk Reduction and Management Office (MDRRMO).

Si Mayor Rajiv Enad maoy nangulo sa pag-turnover sa maong mga communication device ngadto sa nahisgutang mga eskwelahan diin gidawat kini sa mga school heads sa school district 1 ug 2.

Matud ni Enad nga dako ang matabang sa maong mga two-way radio panahon sa emerhensiya ug mga katalagman alang sa paspas nga komunikasyon.  “Kung naay mga problema, calamity or disasters sama sa bagyo, with or without cellphone signal maka-contact mo sa LGU og dali mo maatiman labi na nga mga bata vulnerable kaayo. Nakat-on gyud ta pag-Odette”, matud ni Enad.  Dugang ni Enad nga kon adunay problema sa mga eskwelahan mamahimog magamit ang maong radio system aron makapangayo og tabang ug assistance gikan sa MDRRMO, MITCOM ug task force panahon sa emerhensiya o adunay motumaw nga katalagman. (/BDB) (BANAT NEWS)