Gipusil atubangan sa eskuylahan

CEBU, Philippines — Wala una mopahigayon og klase ang Mactan National High School kagahapong adlawa nunot sa nahitabong pagpamusil diha sa gawas nga bahin sa maong tunghaan niadtong Huwebes sa gabii.

Ang kapolisan nitan-aw sa posibleng kalambigitan sa mga managkaribal nga mga gangs sa mga kabataan sa pagpamusil sa biktimang si Jason Gasta, 18, taga Saac 2, Brgy. Buaya sa maong siyudad.

Usa ka Hanzel Veliganio nga taga Barangay Mactan ug kaubang si Joshua Padon ang gidakop sa kapolisan may kalabotan sa maong pagpamusil.

Si Police Staff Sergeant Rodolfo Sudaria sa Presinto 2 sa Lapu-Lapu City Police Office (LCPO)  miingon nga swerteng natapsingan lang diha sa agtang ang biktima. Dali kining nakadagan pasulod sa maong tunghaan hinungdan nga wala na kini mausbi pa pagpusil sa suspek.

Matud pa ni Sudaria nagsugat sa manghod niini nga nagtungha sa Mactan National High School ang biktima.

Samtang nagpaabot sa gawas nga bahin sa tunghaan, gikatahong kalit nga niduol ang suspek ug gidiretso kini sa pagpusil gamit ang wala matinong kalibre sa armas.

Suwerte na lang nga natapsingan lang ang agtang sa biktima ug nakahigayon pa kini sa pagdagan paingon sa sulod sa tulunghaan

Human sa maong pagpamusil ang mga suspetsado dali nga misibat pahilayo  sa maong dapit apan nadakpan sa gihapon sila sa follow-up operation.

Si Police Chief Master Sergeant Erwin Senadjan nga nahinabi sa Banat News sa telepono miingon nga nanimawos ang mga suspek ngadto sa biktima tungod matud pa gikulata sila niini kaniadto.

Matud pang Senadjan, ‘suyaay’ ra ang hinungdan nga nagkabingkil ang mga suspek ug ang biktima. —/IBM (BANAT NEWS)