Top 2 Most Wanted nadakpan

CEBU, Philippines — Wala na makaikyas sa mga kamot sa mga tinugyanan sa balaod ang usa ka 37 anyos nga lalakeng giingong Top 2 Most wanted person regional level human kini madakpan sa mga sakop sa Criminal Investigation and Detection Group(CIDG)-7 pasado alas 9 sa gabii, adlaw’ng Huwebes.  Si Argie Codera Abella, alyas Arjie Codera Abella, residente sa Sitio Tarcom, Upper Laguerta, Barangay Busay, siyudad sa Sugbo nadakpan sulod sa barko diha sa Port Pier 1, Barangay San Roque ning siyudad.

Ang maong operasyon sa CIDG Cebu Field Unit natigayon pinaagi sa pakig-alayon sa City Mobile Force Company sa Cebu City Police Office, Regional Intelligence Division(RID)-7, Cebu Port Authority ug Philippine Coast Guard.

Napugngan sa kapulisan ang suway matud pa pag-ikyas ni Abella kinsa nalutsan og warrant of arrest sa kasong murder ug homicide.

Si Ma. Lynna Pacamalan Adviento, Presiding Judge sa Regional Trial Court Branch 58, Cebu City maoy mipagawas sa maong warrant nga penetsahan Marso 10, 2022. Way piyansa nga gitakda alang sa temporary niyang kagawasan sa kasong murder.

Samtang si Ricky Jones S. Macabaya, Presiding Judge sa Regional Trial Court Branch 5, Cebu City mirekomendar og P120 mil nga piyansa sa kaso niining homicide.

Matud pa gigamit sa suspek ang pangalan sa ig-agaw niini pagpalit og tiket sa barko.

Si Abella gikatahong miyembro sa “Abella Criminal Gang” nga nalambigit sa gun running, robbery hold-up ug illegal drug trade sa Cebu City ingon man sa mga silingan nga mga siyudad ug munisipyo.

Si Abella giingong mao ang suspect sa robbery ug shooting incident sa Barangay Guadalupe ug Mambaling. Dihang nasibaw iyahang ngalan nitago na kini sa Sitio Tarcom.

Gikatahong ang mga kaso ni Abella may kalabotan kini sa giingong pagkapatay niini kauban sa iyang mga igsuon sa mga karibal nga giilang notadong tigpayuhot sab og ilegal nga drugas diha sa Tarcom niadtong Pebrero 2020 ug Enero ning tuiga.

“Somehow may impact ito sa groups ng illegal drug traders ng illegal drugs kasi base dun sa intelligence report natin itong grupo na ito nagsi-ship na ila ng illegal drugs,” asoy ni Police Col. Peter Tagtag Jr., Regional Chief sa CIDG-7. (BANATNEWS)