Magpuyo nga balaan

CEBU, Philippines — Giawhag sa mga kaparian sa Simbahan ang katawhan nga hinumduman ang tinud-anay nga kahulogan sa pagtimaan sa adlaw sa mga Santos ug Kalag.

Si Fr. Japhet Geonzon, ang assistant chairman sa Commission on Worship sa Archdiocese of Cebu miingon nga ang ang tinud-anay nga selebrasyon sa adlaw sa mga Santos ug kalag mao ang pagpuyo sa pagkabalaan.

Sumala pa ni Geonzon, ang mga Santos, mga ordinaryo nga tawo nga makasasala sab apan naningkamot nga magpuyong balaan mao nga nakadawat sila og gasa.

Gipahinumdoman sab ni Geonzon ang tanan nga ang mga Santos naila sa pagka-simple ug matinud-anon sa ilang pagtuo sa Ginoo.

Matud niya ang pagtimaan aning mga adlawa nagtudlo sa katawhan sa pagpamalandong kun unsay kahulogan sa kinabuhi.

Ang November 2 nagpahinumdum sa tanan nga kita mangamatay gihapon sa umaabot nga panahon mao nga kinahanglang magbuhat lamang og makapahimuot sa Diyos. —Rowena D. Capistrano/IBM

Tanod gidunggab og tari patay

Patay ang barangay tanod human kini gidunggab og tari sa manok sa duha ka mga minor de edad nga giingong iyahang giuwang kay nakakita’g away Domingo sa kaadlawon diha sa Purok 1 Sitio Ardonix, Barangay Taghaguimit, Dakbayan sa Naga.

Ang biktima giila sa Hepe sa City of Naga Police Station Chief Police Lt. Col. Junnel Caadlawon nga si Danilo Alerta Sr.

Base sa initial nga imbestigasyon sa kapulisan dunay nagkarambolang mga kabataan sa maong dapit.

Ang biktima daling miresponde ug miuwang sa mga nag- away nga mga batan-on. Apan gikatahong duha sa mga batan-on ang kalit nga mihamag gidunggab kini kaduha diha sa dughan gamit ang tari sa manok.

Daling misibat ang mga nagkarambolang mga batan-on, samtang gidala sa tamabalan ang biktima diin kini gideklarar nga dead on arrival.

Sa gihimong hot pursuit operation, nadakpan sa kapolisan ang duha ka batan-ong maoy gitumbok nga nagdunggab sa biktima ug gi-turnover na nila sa DSWD. (BANATNEWS)