DVMF midasig sa katawhan sa pagpanagop og iring

CEBU, Philippines — Gidasig sa Cebu City Department of Veterinary Medicine and Fisheries (DVMF) ang mga Sugbuanon nga mosagop og mga iring.

Nasayran dunay mga iring nga gipang-turn over sa maong buhatan nga maoy usa sa gihatagan nila og pagtagad nga maatiman.

Gisaulog kagahapon ang Pusang Pinoy Day diin usa sa gihingusgan og maayo ang paghatag og saktong pag-atiman sa mga iring.

Suma pa ni Dr. Jessica Maribojoc, pangu sa DVMF nga kun dunay gitawag nga aspin (asong pinoy), duna pu’y gitawag og puspins kun pusang pinoy.

“Atong mga puspins need homes as well. Amo gyud pirmi na gi-encourage nga mo-adopt og stray cats as well sab,”matud pa ni Maribojoc.

Nakigtimbayayong usab ang DVMF sa Island Rescue Organization (IRO) foundation alang sa pag-umol og mga seminar o trainings aron mahimong responsable sa pag-atiman og mga iring.

Lakip sa maong seminar mao ang pag-awhag sa katawhan nga pabakunahan ang ilang mga binuhi.

Gipahimug-atan sa DVMF nga kinahanglan gyud og saktong pag-atiman ang mga hayop nga giisip usab sa kadaghanan nga sakop na sa ilang pamilya.

Subsob usab ang paghatud sa maong departamento sa nagkadaiya nila nga mga serbisyo ngadto sa kabaranggayan. — /MEL (BANAT NEWS)