Gipabakwit atol sa bagyong Paeng namauli na
CEBU, Philippines — Namauli na sab sa ilang tagsa-tagsa ka panimay ang mga tawo nga namakwit atol sa pagkuso-kuso sa bagyong Paeng sa dakbayan sa Talisay sumala pa ni Felipa Solana, pangu sa City Social Welfare and Development sa maong siyudad.
Matud niya 59 ka pamilya o 222 ka indibidwal ang mipasilong sa gym sa Barangay Dumlog niadtong Sabado. Sagad kanila nagpuyo duol sa baybayon sa sitio Baybay, Litmon ug Paglaum.
Si Konsehal Danny Caballero, chairman sa committee on Resiliency nitataw nga pre-emptive measure ang ilang gibuhat aron kalikayan ang grabe nga kadaot sa bagyo.
Una niini, si Alvin Santillana, pangu sa City Disaster Risk Reductio and Management Office nipakatap sa iyang mga tawo aron sa pagmonitor sa kahimtang sa kabukiran, kadagatan ug kasapaan.
Nisusi sab ang kapolisan ilabi na ang direktor sa Police Regional Office (PRO-7) sa kahimtang sa mga Talisaynon.
Dugang pa ni Solana nga kagahapon sa hapon ilang gisira ang evacuation center human nga nilinaw na ang kahimtang sa panahon ug namauli na ang mga tawo nga namakwit.
Gipabawnan sab sila og mga food packs nga ilang magamit. –/IBM (BANAT NEWS)
- Latest
