Mga sam-ang gidagsa na

CEBU, Philippines — Nagsugod na og dagsa ang mga tawo sa nagkalain-laing sementeryo sa Sugbu ilabi na sa Metro Cebu nga adunay dili momenus 100 ka mga pribadon ug pangpublikong mga sam-ang.

Sa Dakbayan sa Talisay i human wa na makasinati og pag-uwan ingon man nakita ang kahayag sa kalangitan kagahapon hinayhinay ng nangabot-abot ang mga tawo diha sa mga sam-ang.

Si Jonathan Tumulak, pangu sa City of Talisay-Traffic Operation Development Authority (CT-TODA) nibutyag nga ang mga tawo aron sa paglimpyo sa mga nitsu sa ilang minahal sa kinabuhi nga mitaliwan.

Si Konsehal Danny Caballero, chairman sa committee on Resiliency sa Syudad nihimo sa iyang pag-roving sa mga sam-ang aron masayod sa kahimtang.

Matud pa niya nga sa adunay lima ka mga ambulansya nga magplastada diha sa lima ka sam-ang sa Syudad nga magamit kung adunay emerhensiya.

Asoy pa ni Caballero nga igo sab nga gidaghanon ang ilang magamit karong panahon sa kalag-kalag human nga daghan nasab sila nahuman og bansay sa kabarangayan labot sa pagluwas og kinabuhi.

Si Police Lt. Col. Randy Caballes, hepe sa kapolisan sa Talisay nitataw nga estrikto na sila sa pagpatuman sa mga gipangdili sulod ug gawas sa sementeryo.

Iyang gipahinumdoman ang Talisaynon nga sa dili pa mobiya sa pinuy-anan sigurohon nga sirhan ang panimay o ba kaha magpuli-puli lang og adto sa menteryo aron adunay mahabilin sa panimay nga ang kawatan magpanagana sa pagsulod niini.

Ang menteryo sa Talisay bukas gikan sa alas 6 sa buntag hangtud sa alas 11 sa gabii.

Ang kapolisan sab sa Mandaue City Police Office (MCPO) nga gipangulohan ni City Director Police Colonel Jeffrey Caballes miluwat og guidelines aron maoy ipasunod sa mga tawo nga moduaw sa mga sam-ang.

Gidili ang pagdala ug ilimnong makahubog, armas nga moboto ug bisan unsang matang sa hait nga hinagiban.

Bisan ang pag -inom o pagbaligya og ilimnong makahubog 100 metros gikan sa mga sam-ang gidili sab.

Didili sab ang pagsul-ob of jacket o ang pagdala og backpack ingon man ang pagdala og guitara radio, videoke o karaoke.

Ang chairman sa committee on peace and order sa Konseho sa Siyudad sa Sugbo nga si Konsehal Phillip Zafra miingon nga gipaabot nilang modagsa ang mga tawo karon tungod sa taas nga bakasyon sugod pa niadtong Sabado hangtud ugmang adlawa.

Gihangyo usab niya nga katawhan nga mokooperar sa ipatuman nila nga mga lagda.

“Importante kaayo ang inyong kooperasyon aron magmalinawon ang kalag-kalag,”matud pa ni Zafra sa interview niini sa Banat News.

Giawhag usab niya ang katawhan nga magbinantayon gyud  ug labing maayo nga dili nalang magsul-ob og mga alahas  aron dili kini mabiktima sa posibleng dautang elemento. — Gabriel Bonjoc, Romeo Limpangog/IBM (BANAT NEWS)