Probinsya sa Sugbu pabilin sa blue alert

CEBU, Philippines — Sa pikas bahin, bisan nawala na ang bagyong Paeng diri sa Sugbo, nagpabilin nga anaa sa blue alert status ang Probinsya sa Sugbo

Sa pinaka ulahi nga report s Provincial Disaster Risk Reduction and Management Office (PDRRMO), nimando kini sa mga local disaster officers ug rescue units sa nagkadaiyang lungsod ug syudad sa Probinsya sa Sugbo nga magpabilin nga naka-standby ug alerto sa mga posibleng mahitabo karong long weekend.

“While TCWS (Tropical Cyclone Warning Signal) 1 has been lifted over Cebu, this office remains to be under Blue Alert for monitoring especially during the observance of All Souls Day” matod sa PDRRMO sa ilang situation report kagahapong adlawa.

Ang blue alert nagpasabot nga tanang emergency responders naa kanunay kun kinahanglan ang ilang tabang.

Sukad pa niadtong Biyernes nag-anam na og pauli ang mga pasahero alang sa Kalag-Kalag.

Naundang lang ang pagdagsa sa mga pasahero sa mga pantalan ug terminal human gisuspenso ang byahe sa mga barko nunot sa bagyong Paeng niadtong Biyernes sa gabii ngadto sa adlaw sa Sabado. Apan nabalik ra pud ang byahe sa mga barko pagka gabii sa Sabado ug nagpadayon pagka Domingo. —/IBM (BANAT NEWS)