Gullas mosugyot sa TCC nga sayong ipaubos sa OJT ang mga tinun-an

CEBU, Philippines — Nagtinguha ang konseho sa Dakbayan sa Talisay nga mapaubos na sa On-Job-Training (OJT) sa sayong bahin sa ilang pagtungha ang mga tinun-an sa Talisay City College (TCC).

Kini maoy sugyot ni konsehal Eduardo “Digul” Gullas III, kinsa maoy chairman sa committee on Education ug sa chamber of Commerce.

Matud pa niya nga mas maayo nga sa ikaduhang tuig sa kolehiyo pa lang sa mga tinun-an naa na silay ideya kung unsa ang tinud-anay nga pagtrabaho.

Si Gullas mopalabang unya og resolusyon sa iyang sugyot sa board of directors sa TCC sunod semana.

Matud pa niya nga masinati nang daan sa mga tinun-an ang tinud-anay nga trabaho sa ilang gipili nga kurso.

Kun ugaling sila makabantay nga dili kini haom para kanila ang trabaho aduna pa silay higayon sa pag ilis og kurso mentras sayo pa.

“Kung dili sila ganahan sa trabaho sa kurso dili pa sayang nga sila makashift pa,” asoy pa ni Gullas.

Dako ang pagtuo sa konsehal nga sa ingon niini nga paagi dili maglisod ang mga tinun-an sa pagpangita unya og trabaho tungod sa ilang kasinatian.

Una niini, si Gullas nipalabang og resolusyon sa pag awhag sa mga negosyanti sa siyudad nga mokuha og Talisaynon nga mga empleyado.

Ang iyang laraw gihangop sab kini sa grupo sa mga negosyanti sa siyudad pinangulohan ni Cyril Velasco. — /MEL (BANAT NEWS)