Segregation sa basura hugot na nga ipatuman sa siyudad

CEBU, Philippines — Hugot na nga ipatuman sa kagamhanan sa siyudad sa Sugbo ang istriktong implementasyon sa polisiya nga “no segregation, no collection” nga ubos sa City Ordinance No. 2031.

Atol sa Panaghisgot forum, gibutyag sa garbage czar nga mao usab ang pangu sa Cebu City Environmental Sanitation Enforcement Team (Ceset) nga si Grace Luardo nga sa matag garbage truck ubanan kini og mga barangay environmental officers (BEOs) aron maseguro nga masita ang wala motuman sa polisiya.

Kun masakpan sa mga BEO nga wala gipatuman sa mga tawo ang segregation kun paglahi sa mga basura nga malata ug dili malata maisyuhan dayon kini og citation tickets.

Ang koleksyon sa dili malata nga basura ipatuman matag Martes, Huwebes ug Dominggo. Samtang ang mga malata nga basura kuhaon sa matag Lunes, Miyerkules, Biyernes ug Sabado.

Nasayran nga gipatuman karon sa administrasyon ni Mayor Michael Rama ang Oplan Disiplina ug usa sa mga unod niini mao ang istriktong implementasyon sa segregation sa basura.

Gimandoan usab ang BEO alang sa lapad nga pagpahibawo ngadto sa katawhan kalabot sa mga ordinansa sa siyudad nga maghatag og proteksyon sa kalikopan.

Giawhag usab ang lig-ong kooperasyon sa mga opisyales sa barangay, homeowners associations, tag-iya sa mga establisamento ug ang tibuok komunidad.

Gihingusgan usab sa CESET ang pagpanakop sa mga tawo nga magpataka og pangluwa ug pangihi.

Aron molig-on ang puwersa sa pagsita sa violators, gi-deputized na usab sa CESET ang mga barangay tanod nga motabang sa pagpanakop sa mga violators. (BANAT NEWS)