Heritage summit himoon sa dakbayan sa sugbo

CEBU, Philippines —  Isip kabahin sa pagpalambo og samot sa kultura ug kabilin , mopasiugda ang kagamhanan sa  Dakbayan sa Sugbo og “Heritage Summit “ nga mahitabo sa unang bahin sa buwan sa  Disyembre ning tuiga.

Pormal kini nga gianunsyo sa chairman sa Cebu City Cultural and Historical Affairs Commission nga si Bise Mayor Raymond Garcia atol sa seremonyas sa subling pagbukas sa Casa Gorordo Museum  sa Ramon Aboitiz Foundation Inc. diha sa Barangay Tinago kagahapon sa hapon.

Kahinumdoman nga nasirado kini kaniadto tungod sa pandemya.

Nagkanayon ang bise mayor nga ang tumong sa Heritage Summit nga makahimo ang kagamhanan sa dakbayan og usa ka Heritage Charter nga magsilbing giya sa pagpanday og mga balaodnon alang sa pagpanalipod sa kultura ug kabilin  sa mga Sugbuanon.

Usa pud sa target niini nga maka-establisar og heritage district.

Nasayran nga nagbaha ang heritage sites sa dakbayan nga nag-agni usab og daghang turista.

Una na nga nigawas ang balita sa niaging semana nga mahimo na nga dakong museum ang City Hall sa higayon nga ibalhin na kini sa South Road Properties.

Sa higayon nga mahimo na kini nga museum, tataw nga malakip kini sa heritage district.

Nitambong usab sa pagbukas pag-usab sa Casa Gorordo mao si Department of Tourism Undersecretary Ferdinand C. Gumabao. (BANAT NEWS)