Notadong tulisan nadakpan sa kapolisan

CEBU, Philippines — Usa ka gipasanginlang notadong tulisan ang nahulog sa mga kamot sa kapulisan human kini nagbahis-bahis sayo sa kaadlawon niadtong adlaw nga Martes diha sa Magallanes Street, Barangay Ermita sa Dakbayan sa Sugbo.

Ang inisyal nga rason sa pagdakop kaniya tungod sa tawag sa mga tawo bahin sa usa ka armadong lalaki nga nagbahis-bahis diha sa maong dapit.

Sa pagabot sa kapolisan nakwelyohan dayon kini ug nasakpang nagdala og armas. Giila ang suspek nga mao si Jerlan Sabanal alyas Boy Langaw.

Ang hepe sa Police Station 5 , Police Major Kenneth Albotra mibutyag nga notado na ang suspek sukad pa kaniadto dihang menor de edad pa kini tungod sa pagkalambigit niini sa nagkalain-laing krimen sama sa pagpanulis.

“Minor pa ni siya kaniadto naa na gyud ni siya’y pangalan, notado gyud ni siya,” sigon ni Albotra.

Si Sabanal gipangita sab sa kapulisan sa Police Station 1 o Pari-an Police Station tungod kay siya maoy gitumbok nga nitulis sa usa ka pasahero dia sa Barangay Kamagayan sa miaging adlaw.  Si CCPO Director Police Col. Ireneo Dalogdog miingon nga bisan ang mga vendors diha sa Kamagayan nga nakasaksi sa maong pagpanulis positibong miila sa suspek kay nakakit sila sa komosyon.

Ang maong hitabo gi-post sa biktima sa social media mao nga gimando ni Dalogdog sa hepe sa Police Station 1 Police Major Efren Diaz nga pangitaon ang suspek.

“Gi-convince nila ang biktima, unya karon naay picture gipakita kay kato diay suspect nga si alyas Boy Langaw in and out nato siya jail unya naa to siya’y mga kaso nga robbery sa uban pang stations,” asoy pa ni Dalodog.

Atol sa pagdakop kang Sabanal, nakuhaan kini og Magnum .357 Tauros revolver nga dunay upat ka bala.

Matud pa nga dunay mga menor de edad nga mga sakop si Sabanal nga giingong iyaha sab tinudloan sa pagpanglabni ug pagpanulis nga karon gipangita na sa kapolisan.

Base sa rekord sa kapolisan, si Sabanal napriso na og 12 ka tuig tungod sa pagpanulis ug ilegal nga drugas ug dili palang kini dugay nakagawas sa prisohan niadtong Septiyembre 21, 2022.  Kasong kalapasan sa illegal possession of firearms ug pagpanulis ang ipasaka batok sa suspek.—  Rowena Capistrano/IBM (BANAT NEWS)