Bishop Labajo nagmisa sa fiesta ni St Francis sa Naga

CEBU, Philippines — Giawhag ni Auxiliary Bishop Ruben Labajo, D.D sa Archdiocese of Cebu ang mga magtutuo nga magpakabuhi nga dunay concern og paghuna huna sa ubang tawo.

Kini iyang gipadayag atol sa wali sa misa nga gipahigayon alang sa ika-193rd Fiesta Celebration ni St. Francis of Assisi sa Dakbayan sa Naga.

Uban sa kaparian nga nikonselebrar sa misa si Labajo miingon nga ang pagsunod ni kristo kinahanglan pinaagi sa pagtuo ug dili sa timailhan ug sa milagro lang, tungod kay sa kalisod nga natagamtaman sa katawhan anaa ang dios nga nag-uban kanato.

Dugang pa niya nga angayan batunan sa katawhan sama ni Saint Francis, ang kinaiya nga mahimong sinodal church, simbahan nga nagpanaw nga adunay panaghiusa ug paghuptanay alang sa kalambuan sa simbahan.

Sumala pa ni Labajo, sa pagsaulog sa kapistahan ni Saint Francis, angay ang katawhan magkabuhi nga dunay concern ilabi na ngadto sa mga nanginahanglan ug dili lang hunahunaon ang ilang kaugalingon, lakip usab ang kalisod nga ilang pagasaw-an.

Ang maong pontifical mass ni Labajo, gitambongan sa mga opisyal sa Dakbayan sa Naga nga gipangulohan ni Mayor Valdemar Chiong ug mga opisyal, lakip usab sa nitambong si kanhi mayor Kristina Vanessa Chiong, diin usa ka resolution ang gitunol sa mga opisyal ngadto sa auxiliary bishop isip ilang panimbaya ug pag-ambit sa dakong dungog human kini gipili ni Pope Francis.

Ang maong pasidungog nga nadawat ni labajo, iyaha kining gipasalamat ug gidawat sa dakong kahinangop.

Si Chiong sa iyang bahin, mapasalamaton usab nga sa human sa katalagman sa bagyong Odette og taliwa sa gisagobang nga COVID-19 malampuson nga napahigayon ang pista ni Saint Francis of Assisi. MEL (BANATNEWS)