Kapitolyo manghatag og school supplies sa mga tinun-an

CEBU, Philippines — Moabot sa 133, 400 ka mga tinun-an sa kinto distrito ang makadawat og school supplies sa Probinsya sa Sugbo.

Atol sa World Teacher’s Day niadtong Oktubre 5, gipangulohan ni Gobernador Gwendolyn Garcia ang seremonyal nga pag pag-apud-apod og mga educational supplies ngadto sa mga tinun-an sa lungsod sa Catmon.

“Kining atong mga school supplies, ako ni ikasaad ninyo, samtang ako pay gobernador, ipadayun ta gyud ni pag apod-apod ang mga school supplies alang sa atong mga kabataan,” matud ni Gobernador Garcia sa taho sa Sugbo News, ang news portal sa Probinsya sa Sugbo.

Gawas sa mga school supplies, naghatag usab og toolkits ug certificates of completion ang Kapitolyo ngadto sa 214 ka mga Sugbo Kahanas graduates sa kinto distrito.  Atol sa kalihokan, si Garcia niawhag sa mga graduates nga motapos gyud sa short-term courses sa nagkadaiyang skills training ug mogamit sa mga ekipo nga ilang nadawat aron makasugod sa ilang kaugalingong negosyo nga maoy tumong sa programa.

Ang Sugbo Kahanas usa ka programa sa Kapitolyo uban sa Technical Education and Skills Development Authority (TESDA) paghatag og skills training sa mga Sugboanon aron nga makapangita og panginabuhian gamit ang skills nga ilang nakat-unan. — (BANAT NEWS)