166 na ang gidaghanon sa mga menor nga na-rescue sa Talisay
CEBU, Philippines — Niabot na sa 166 ka menor de edad ang na-rescue sa kapolisan sa Dakbayan sa Talisay sa ilang pag-istrikto sa curfew sukad niadtong buwan sa Agosto niining tuiga.
Gani 30 ka menor ang ilang na-rescue sa niaging gabii.
Nihangyo si Police Lieutenant Colonel Randy Caballes, hepe sa kapolisan sa siyudad nga unta mokooperar ang katawhan kanila tungod kay alang kini sa kaayohan sa tanan.
Nitabang kanila ang mga force multiplier, barangay tanod ug gani lakip na ang Bureau of Jail Management and Penology (BJMP) sa pagpagamit sa ilang sakyanan nga maoy sakyan sa mga ma-rescue nga menor de edad.
Magsugod ang curfew sa alas 10:00 sa gabii hangtud na kini sa alas 4:00 sa kadlawon.
Niadtong Domingo sa kadlawon duha ka grupo sa mga batan-on ang nagrambol diha sa Barangay Linao nga niresulta sa pagkadisgrasya sa usa ka menor de edad.
Ang maong menor nabanggaan sa niagi nga motorsiklo samtang sila nagginukdanay diha sa karsada.
Ang duha ka lider sa grupo nasikiop na apan ang uban nga apil sa rambol gipangita pa karon. —/BDB (BANAT NEWS)
- Latest
