Menor mahimo na nga isulod sa OSC bisan wala pa makasohi

CEBU, Philippines — Ang mga menor de edad nga makahimo og kalapasan sa balaod mahimo nang isulod diha sa Operation Second Chance bisan og wala pa kini mapasakahi og kaso.

Kini ang gibutyag ni Police Lieutenant Colonle Wilbert Parilla, deputy city director for administration.

Matud ni Parilla nga aduna nay panagsabot tali sa Committee on Peace and Order sa siyudad nga gipangulohan ni Konsehal Philip Zafra ug ubang ahensiya apil ang kapolisan nga mahimo nang kabutangan ang OSC sa mga menor de edad nga makasala bisan ug wala pay gipasang-at nga kaso batok kanila.

Si Parilla nagkanayon nga ang OSC mahimong usa ka lugar diin adunay ipanghatag nga intervention ang kagamhanan ngadto sa mga menor de edad nga wala pa mapasakahi og kaso tungod kay wala pa gitugot sa balaod. Mapasalaamton ang kapolisan nga adunay facility nga kabutangan sa mga menor de edad nga ma-rescue gikan sa mga nagkadaiyang kalapasan nga ilang nahimo. —BDB (BANATNEWS)