Konseho sa Cebu City nangayo og report sa kinatibuk-ang gasto kuryente

CEBU, Philippines — Gihangyo sa  Cebu City Council ang Street Lighting Division sa Department of Public Services (DPS) nga motunga sa ipahigayong executive session aron pagpahibalo sa konseho kabahin sa kasamtangang kahimtang o estado sa street lighting lakip na ang mga gasto niini ingon man sa ilang mga plano ug programa.

Ang konseho sa siyudad niaproba sa resolusyon nga giduso ni Konsehal Nestor Archival, Sr. kabahin sa maong katuyoan.

Matud ni Archival nga ang kinatibuk-ang gasto sa kuryente sa mga building ug suga nga gimentinar sa kagamhanan sa Dakbayan sa Sugbo sukad niadtong Hulyo 2022 nga gihatag ngadto sa Department of General Services (DGS) nikabat ngadto sa kapin P34,262,202.04.

Nasayran nga atol sa regular session sa Sangguniang Panlungsod sa niaging buwan, si Konsehal Jocelyn Pesquera niduso og resolusyon nga naghangyo sa Human Resource Development Office (HRDO) nga mosumiter ngadto sa Sangguniang Panlungsod og report sa gidaghanon sa mga personahe lakip na ang regular, casual, ug job order nga ubos sa Street Lighting Division sa DPS nga nagpakita sa gasto sa personnel.

Sa wala pa maaprobahi ang maong resolusyon adunay nahitabong diskusyon sa mga sakop sa konseho nga nagpatin-aw sa panginahanglan sa datos sa tibuok empleyado sa kagamhanan sa siyudad dili lang sa Street Lighting Division.

Gihangyo usab sa konseho ang Street Lighting Division ubos sa DPS nga dad-on ang kopya sa kontrata tali sa Cebu City government ug Visayan Electric Company (VECO) ingon man records of payment nga gihimo sa city government  gikan sa buwan sa Enero hangtud  sa Disyembre 2021 ug Enero hangtud sa Agosto 2022. Ang executive session gikatakda karong Oktubre 5, 2022. BDB (BANATNEWS)