E-trikes dili na paagion sa dagkong karsada
CEBU, Philippines — Gihingusgan karon sa Cebu City Transportation Office ang pagsita sa mga E-trikes ug e-bikes nga moagi sa mga dagkong karsada sa siyudad tungod sa peligrong dala niini ngadto sa nagdala, mga pasahero niini ug bisan sa mga pedestrians.
Sa statement sa CCTO duna nay kasabotan kaniadto ang mga drayber sa e-trikes nga dili sila moabot sa mga main road. Apan nabantayan nga daghan na kanila ang magsige na og tadlas pamasahero o anha moagi dala ang ilang pasahero.
Ang kasabotan nila nga dili sila mogawas sa main road kondili anha lang sila magtuyok-tuyok sa mga barangay roads.
Dili palang dugay, dunay tinun-an sa Mambaling nga nadasmagan og e-trike. Sa miaging buwan, duha ka tawo ang nakalas, babayeng pasahero ug drayber sa e-trike diha sa Brgy. T. Padilla human nadasmagan ang e-trike nga ilang gisakyan.
“Ato na gani nga gipangitaan og paagi nga dili sila makulban sa ilang panginabuhi apan mosupak lang gihapon sa gikasabotan,” dugang mensahe sa CCTO.
Panghinaot sa maong traffic agency nga tumanon nalang gyud unta sa E-trike drivers ang kasabotan aron dili na masubli ang maong insidente.
Samtang ang hepe sa CCTO nga si Paul Gotiong nibutyag nga nagpadayon ang ilang pag-organisar sa mga drayber sa e-trikes aron mausa ang ilang tingog ug mapaabot kanila ang mga mensahe sa siyudad. “Ang kasabotan gyud kay , adto ra gyud sila sa mga interior roads . Para raman sad ni sa ilang kaluwasan. Gani duna tay nadawat nga report nga dunay ubang E-bike drivers nga mokalit lang og insert sa kilid , kuyaw kay na sa disgrasya,” matud pa ni Gotiong sa pakighinabi niini sa Banat News.
Duna karoy laraw nga i-regulate na kining mga e-trikes diha sa kadalanan.— IBM (BANATNEWS)
- Latest
