130 ka tawo sa Pit-os gipabakwit

CEBU, Philippines — Moabot sa 130 ka mga indibidwal nga residente sa tulo sa ka sitio sa Barangay Pit-os ang gipabakwit human ang tubig sa sapa misaka ug misulod ug mibanlas na sa pipila ka mga panimalay dihang mibunok ang kusog nga uwan niadtong Biyernes sa hapon.

Matod ni Pit-os Barangay Councilor Dexter Velayo nga ang mga gipabakwit mga residente sa Sitio Tabok, Lower Tanay ug Pundok nga naa nagpuyo duol sa sapa.

Ang Konsehal miingon nga dihang mibunok ang kusog nga uwan misaka ang tubig sa sapa nga miresulta nga dunay mga kabalayan nga gibanlas ug nasudlan og tubig.

Sa Sitio Tabok lima ka balay ang gi-washout, duha ka balay gi-washout sa Sitio Pundok ug sa Sitio Lower Tanay upat ka balay ang nasudlan og tubig hinungdan ang mga tawo gipabakwit sa Pit-os National High School.

“Karon gyud ang pinakadako gyud nga nasinati namo nga baha, naabtan mga poste, manguryenti na gud ang tubig, ang wires naputol”, sigon ni Konsehal Velayo.

Si Velayo kinsa maoy Chairman sa Disaster Committee sa Barangay Pit-os miasoy nga sa buwan sa Agosto kaunom na gibahaan ang ilahang dapit ug sa buwan sa Septyembre ang insidente niadtong Biyernes ang maoy una og pinakagrabe matod pa.

“Kaming barangay (officials) naghimo nami og didto letter padong sa DWUP kay ako untang gusto nga ma-assess sa DWUP para kung naay bakante ang mga urban willing man sad sila mobalhin ang mga namuyo diri kilid sa sapa pero mao lagi naghuwat ko sa assessment sa DWUP,” asoy pa sa konsehal.

Gusto sa konsehal nga mabalhin ang mga tawo sa ilang Barangay nga naa duol sa sapa nagpuyo kay nabalaka na sab sila sa kaluwasan sa mga tawo gumikan sa mga pagbaha nga nahitabo.— IBM (BANATNEWS)