Desisyon sa IATF gihangop ni Garcia

CEBU, Philippines — Gihangop ni Gobernador Gwendolyn Garcia ang bag-ong desisyon sa Inter-Agency Task Force nga opsyonal nalang ang paggamit og facemask sa outdoor spaces.

Ang IATF bag-o pa lang nirekomendar nga himoon na lang nga opsyonal ang paggamit sa facemask sa open spaces kini human nga ang Sugbo miuna sa pagluwat sa maong kamandoan niadtong Hunyo karong tuiga ug dayon nisunod karong bulan ang dakbayan sa Sugbo.

“I am just so grateful that finally Cebu’s policies are now being reaffirmed by the IATF,” matud sa gobernador.  Gisubli ni Garcia nga kinahanglan adunay “balancing act” sa pagdumala sa pandemya sa coronavirus disease.

Kini ang pagpanalipod sa panglawas sa mga tawo apan pagsiguro usab nga makapadayon sa panginabuhi ang mga tawo.

Ang Probinsya sa Sugbo hagbay ra nga nipalugak sa mga Covid-19 restrictions niini kini hinongdan nga pipla na usab kahigayon nga sumpaki ang kapitolyo ug ang pipila ka national agencies sukad pa sa niaging administrasyon, hinuon nagtuo si Garcia nga ang bag-ong mga sakop sa IATF karon dili na sama kaniadto.

Si Garcia nagplanong palapdan ang opsyonal nga paggamit og facemask sa sulod o indoors susama sa Singapore. Apan matod sa gobernador kinahanglan pa siya mokunsulta sa ubang sektor ug ahensya kalabot niini. (BANAT NEWS)