Ordinansahon giduso aron wad-an og bili ang usa ka ordinansa

CEBU, Philippines — Si Cebu City Councilor Jocelyn Pesquera nisugyot og ordinansahon nga magbasura sa usa ka ordinansa nga nagtugot sa pagbaligya sa wala malukat sa gisubasta nga real estate properties sa dakbayan sa Sugbo pinaagi sa public bidding ug paghatag og pipila ka guidelines niini.

Ang gisugyot nga lakang giduso na ngadto sa Committee on Laws, Ordinances, and Styling alang sa dugang pagtoon.

Ang section 256 sa Local Government Code naghatag og mga remedyo sa pagkolekta sa real property tax ug usa niini pinaagi sa administrative action pinaagi sa levy sa real property.

Ang section 260 sa naasoy nga balaod naghatag sa paagi diin ang kabtangan nga gipahamtang ibaligya pinaagi sa subasta.

Aron makamugna og dugang pundo sa siyudad, giaprobahan ang CO 2363 diin ang City Treasurer gihatagan og awtoridad sa pagsubasta sa wala malukat nga mga kabtangan sa real estate.

Gisugyot sa giduso nga ordinansahon nga ang awtoridad nga gihatag sa City Treasurer pinaagi sa CO 2363 kinahanglan nga bawion.

Sumala sa gisugyot nga ordinansa, ang pagka-epektibo sa CO 2363 "limitado" tungod kay ang bidding kinahanglan nga itakda sa CTO, 90 ka adlaw gikan sa pag-apruba sa ordinansa. —MEL (BANATNEWS)