Sagad sa spaghetti wires wa nay koneksyon

CEBU, Philippines — Nagpadayon ang Cebu City Government sa paghipos sa mga spaghetti wires nga makita sa kadalanan sa siyudad sa Sugbo ilabi na sa mga dagkong kadalanan.

Sigon ni Cebu City Councilor Jerry Guardo kinsa maoy gitahasan sa pagbuhat niini nga kabahin kini sa Oplan Ratsada ni Mayor Michael Rama kay human sa pag-igo sa bagyong Odette daghan pang wires ang wala pa gihapon mahipos, apil niini ang mga poste nga nagbahirig ug guba na.

Matod ni Guardo nga 60 percent mga wires nga makita sa mga dagkong karsada walay koneksyon.

Ang konsehal nasagmuyo sa mga telecommunications companies nga kun ilang putlan sa serbisyo ang ilang subscribers, putlan lang nila og serbisyo apan dili ang kable nga ilang gikutay.

Ang resulta, nagkadaghan ang mga kable sa telcos diha sa kadalanan nga walay mga koneksyon.

“Mao na atong mandate karon atong ipa-pullout nila, ipatangtang gyud nato ang mga dead wires para limpyo ang atong palibot ug aron malikayan sad nato ang disgrasya kay the moment nga mo-sag na siya in fact passed an ordinance i-raise ang height minimum requirement niya kay daghan man gud kaayo disgrasya nga report nga nakaligid ang mga sakyanan, natumba ang mga poste so because of this sag wires, so as much as possible ato ng i-raise up aron malikayan sad nato ang disgrasya,” matud ni Guardo.

Pipila sa mga dapit nga daghan og dead wire mao diha habig sa Ramos, Carbon Public Market, V. Rama, dapit sa Cebu City Sports Center ug General Maxilom Avenue.

Matud ni Guardo daghan pang dapit sa siyudad nga ilang adtuon sama diha sa Busay ug uban pang lugar.

“I really appreciate the support of TelCos coming from Globe, PLDT, Smart, Converge, VECO they’re really put together to support the plan of City to really remove this messy and untidy wires,” ni Guardo pa. —IBM (BANATNEWS)