Konseho nihangyo sa pagtuon kabahin sa solar-powered system

CEBU, Philippines — Ang Cebu City Council nihangyo sa committee on environment, natural resources, energy, and other utilities sa konseho nga tun-an ang pagbutang og solar-powered system o ubang matang sa renewable energy sources sa tanang building nga gipanag-iya ug gimentinar sa kagamhanan  sa siyudad ug ipaniguro nga dili makagasto ang siyudad niini.

Giaprobahan sa konseho sa siyudad ang resolusyon nga giduso ni Konsehal Nestor Archival Sr. kalabot niini.

Gihangyo usab sa konseho ang komitiba nga magsumiter og rekomendasyon sulod sa 45 ka adlaw o sa dili pa ang Septiyembre 23, 2022 gikan sa pagdawat sa resolusyon.

Nagkanayon si  Archival nga atol sa  bagyong Odette nakabaton og dako nga kadaot ang siyudad nga niresulta sa kakuwang sa kuryente sulod sa kapin sa usa ka buwan.

Ug ang pagsaka sa gasto sa kuryente makadaot sa panudlanan sa siyudad.

“Solar powered systems and other renewable energy sources are already available in the local market. To save in electrical cost, there is a need to shift in using renewable energy”, matud ni Archival.

Base sa datos sa Department of General Services (DGS)nikabat ngadto sa P56.6 milyones ang kinatibuk-ang gasto sa kuryente sa mga edipisyo nga gimentinar sa kagamhanan sa siyudad niadtong  tuig 2021.

Samtang niadtong Hulyo 2022, ang DGS nitaho nga ang kinatibuk-ang gasto sa kuryente sa mga edipisyo nga gimentinar sa siyudad anaa sa P34.2 milyones.

Nasayran nga gisugyot usab ni Archival nga sugdan na sa kagamhanan sa siyudad ang hinay-hinay nga paggamit sa mga electric vehicles aron makadaginot.

Matud ni Archival nga ang siyudad kinahanglang mosagop og pruweba sa konsepto diin imbes mogamit og gasolina o diesel nga makina mopalit sila og mga dekuryenteng sakyanan.

Gihangyo sa konseho ang mga komitiba sa transportasyon ug kalikupan nga tun-an kong mahimo ba ang pagsagop sa malungtarong transportasyon pinaagi sa mga dekuryenteng sakyanan. BDB (BANATNEWS)