Kapin sa 4,000 ka  classroom  sa  Cebu City magamit na

CEBU, Philippines — Padayon ang pagpaningkamot sa Local School Board sa kagamhanan sa Siyudad sa Sugbo nga mapaayo ang mga nangaguba nga mga tunghaan gumikan sa bagyong Odette niadtong Disyembre 16, 2021.

Ang hepe sa Local School Board Melissa dela Cruz nagkanayon nga sa 5,153 ka classrooms sa siyudad anaa sa 4,488 ang magamit sa pagbukas sa klase karong Agosto 22, 2022.  Pasabot niini nga anaa nalang sa 665 ka lawak-saringan ang kinahanglan pa nga ayuhon.

Matud ni dela Cruz nga 767 ka classrooms ang na-report sa ilahang buhatan nga nangaguba tungod sa bagyong Odette diin ilaha dayon kining gisugdan sa pag-ayo.

Sa pagkakaron adunay 156 ka classrooms nga padayong giayo ug anaa sa 125 ang  nakompleto na og ayo sa LSB.

Giklaro ni dela Cruz nga ang mga classroom nga wala pa naayo hangtud karon anaa pa sa mga tag-as nga istraktura ug dili usab gusto sa LSB nga ibutang sa risgo ang kinabuhi sa ilahang mga trabahante.

Gibutyag ni dela Cruz nga aduna nay gihatag ang ulohang buhatan sa Department of Education (DepEd) nga pundo alang sa pagpaayo sa mga eskwelahan.

Naningkamot usab ng LSB ug DepEd nga makakita og sponsors nga mopaayo sa mga dagkong istraktura sa mga tunghaan.

“Both kami sa LSB ug ang DepEd nagtinabangay mi sa mga stakeholders. For example, ang Lhuillier naa sila’y gipang-adopt nga eskwelahan, tulo na ka eskuylahan. Sama pod sa

Dakay Construction, gi-adopt pod nila ang Lahug, ang City Science High, ang Oprra”, dugang ni dela Cruz.  (BANAT NEWS)