Usbaw sa buhis sa siyudad sa Sugbo hayan ipatuman

CEBU, Philippines — Giplanohan sa kagamhanan sa siyudad sa Sugbo ang pagpa-usbaw sa buhis sunod tuig (2023) aron madungagan ang panudlanan niini.

Base sa taho sa City's Public Information Office, si Atty. Jerone Castillo, special assistant ni Mayor Michael  Rama sa finance matter, miingon nga ang tax increase pinasubay sa kamanduan ngadto sa local governments nga kanunay mag-revaluate ug magpataas sa buhis.

Ang real property tax (RPT) sa dakbayan maoy gipasabot ni Castillo.

Nipasabot si City Treasurer Mare Vae Reyes nga ang dakbayan sa pagkakaron naggamit sa karaan pa nga revenue tax code.

Ang katapusan nga higayon nga napausbawan ang RPT niadtong pang 2003.

Si Reyes mipasalig nga dili usab ipahamtang sa mayor kining tanan kung dili mokonsulta sa kinatibuk-ang publiko, labi na sa maapektuhan.

Ang City Assessor’s Office nagpahigayon na og tigom sa mga stakeholders kalabot sa planong pagpasaka sa real property tax.

Gusto usab patas-an sa City's Treasurer Office ang mga bayranan sa siyudad sa ubang mga serbisyo niini.

Ang City government kinahanglang mousbaw sa buhis aron dunay igong pundo sa mga proyekto, subay sa tumong sa mayor nga masusama sa Singapore ang siyudad. (BANATNEWS)