Road clearing padayong ipatuman sa siyudad sa Sugbo

CEBU, Philippines — Andam nga mopatuman ang kagamhanan sa siyudad sa Sugbo sa gibanhaw nga direktiba sa Department of Interior and Local Government (DILG) sa pagpahigayon og road clearing operations.

Ang Cebu City Transportation Office (CCTO) regular nga naghimo og operations sa paghawan sa mga babag sa karsada ug sidewalks sa dakbayan.

Matud pa ni CCTO Head Paul Gotiong nga sukad sa pagsugod sa bag-ong termino ni Mayor Michael Rama, nihimo na sila og clearing operations kauban ang Prevention Restoration Beautification and Enhancement Team, Cebu City Disaster Risk Reduction and Management Office ug City Environment and Sanitation Enforcement Team.

Ilang nasuta nga kasagarang makababag mao ang illegal parking sa mga motorsiklo ug mga sakyanan daplin sa karsada.

Ang DILG niisyu ug Memorandum Circular No. 2022-085, pinetsahan og Hunyo 20, 2022, nga nagmando sa tanang local chief executives sa pagpadayon sa paghawan sa mga karsada ilabi na karon nga ni abli na usab ang mga patigayon.

Si PROBE Team Head Raquel Arce niingon nga andam ang ilang buhatan sa pagpatuman sa direktiba apan gusto siya makig-estorya una sa mayor aron masayran ang unod sa mga instruksyon kalabot niini.

Gawas sa pagpahigayon sa regular road clearing operations, ang DILG memorandum circular nagmando usab sa Sangguniang Panglungsod sa paghimo og road clearing ordinance alang sa siyudad.

Samtang si City Councilor James Anthony Cuenco, committee on transportation chairperson sa City Council, andam usab mosugyot sa maong ordinansa.

Suma ni Cuenco nga ang mga nakababag sa karsada nakahasol gyud sa mga tawo busa kinahanglan nga ipadayon ang pagpatuman sa road clearing operation.

Sa iyang bahin, si City Councilor Phillip Zafra, chairman sa committee on public order and safety, nibutyag nga gusto sab niyang hulaton ang direksyon sa mayor kabahin sa direktiba. —MEL (BANATNEWS)