Mayor Chiong naniid sa mga tapulan ug ligoy nga kawani

CEBU, Philippines — Gipahibawo ni mayor Valdemar Chiong sa siyudad sa Naga nga padayon ang iyang pagpaniid sa mga tapulan ug ligoy nga mga empleyado sa City Hall.

Si Mayor Chiong miluwat sa maong pahibawo atol sa ilang regular nga flag ceremony.

Gibutyag usab ni Chiong nga nagproblema siya karon gumikan sa kadaghan sa tawo nga gusto nga manarbaho.

Apan maglisod siya sa paghatag niini tungod kay daghan naman ang trabahante sa kagamhanan sa siyudad.

Hinuon siya mipasumbingay ngadto sa mga job order ug bisan sa mga regular nga kawani nga tarungon gyud nila ang ilang mga trabaho. “Kung dili namo ganahan manarbaho hala sulti lang mo kay undang,” nagkanayon si Chiong.

Ang mayor niingon nga padayon ang iyang pag obserbar sa tanang mga kawani sa City Hall ilabi na nga nakadawat siya og impormasyon nga dunay mga kawani nga ligoy sa ilang trabaho ug mas daghan ang panahon nga wala sila sa ilang opisina.

Dugang pa ni Chiong nga sugod sa buwan sa Septiyembre P400 na ang sweldo matag adlaw sa mga job order nga kawani. —MEL (BANATNEWS)