Mga department heads gidasig aron mosaka ang kita sa siyudad

CEBU, Philippines — Giawhag ni Cebu City Mayor Michael Rama ang kadagkoan sa mga departamento ug buhatan sa City Hall nga mohimo og mga programa aron mapausbaw ang revenue kun kita sa dakbayan.

Kini aron mapundohan ang ilang budget proposals alang sa pagpatuman sa mga proyekto nga makabenepisyo sa katawhan. Atol sa “budget forum” niadtong Biyernes, nga gitambongan sa mga kadagkoan sa mga buhatan sa City Hall, si Rama, kinsa nakighinabi pinaagi sa Zoom platform, nihangyo usab kanila nga mopasalig sa pagpatuman og “sound fiscal management” sa ilang tagsa-tagsa ka buhatan.

Sa report sa Public Information Office (PIO) sa dakbayan, miingon si City Accountant Jerome Ornopia atol sa maong forum nga ang koleksyon sa dakbayan niubos sa milabay nga tulo ka tuig.

Niadtong 2019, ang gross collection sa dakbayan anaa sa P7.7 bilyones og mius-os kini ngadto sa P7.3 bilyones sa 2020, ug P6.6 bilyones sa 2021.

Matud ni Ornopia nga lakip sa hinungdan sa pag-us-os mao ang pagkunhod sa business taxes nga nakolekta sa kagamhanan. Kini, tungod kay daghang mga negosyo sa syudad ang mihunong sa ilang operasyon tungod sa negatibo nga epekto sa COVID-19 pandemic.

Sa iyang bahin, si City Treasurer Mare Vae Reyes, miingon nga ilang isugyot nga patas-an ang fees and charges alang sa services sa siyudad.

Gihangyo ni Reyes ang ubang mga department heads nga mosumitir sa ilang kaugalingong mga proposal.

Ang budget forum kabahin sa pagpangandam sa dakbayan alang sa budgeting process niini.

Human sa forum, ang matag departamento ug opisina mo-draft ug mosumiter sa ilang tagsa-tagsa ka budget proposals. Sundan kini og mock budget hearing uban sa Local Finance Committee, pagpangandam sa Local Expenditure Program, ug pag-isyu og Budget Message gikan sa mayor.

Ang pagsumiter ngadto sa City Council sa proposed executive budget alang sa 2023 kinahanglan dili molapas sa Oktubre 16. — /MEL (BANAT NEWS)