Paghatag og P50M nga hinabang sa Abra gitun-an
CEBU, Philippines — Gipatun-an na ni Mayor Michael Rama sa Cebu City Disaster Risk Reduction Management Council ang pag-apod-apod ang P50 milyones nga pinansiyal nga hinabang ngadto sa Abra nga gitay-og sa 7.0 magnitude nga linog niadtong Hulyo 27. Prayoridad sa Siyudad sa Sugbo ang mga area nga grabe kaayo og kadaot gumikan sa linog.
Base sa taho sa Cebu City Public Information Office, si Atty. Gerry Carillo, chairman sa CCDRRMC nagkanayon nga gusto ni Rama nga mahatag ang hinabang sa labing dali nga panahon ug ilang unahon ang mga lugar nga nakasinati og intensity 4 ngadto sa 7.
Isip tubag sa mando ni Rama, si Carillo nipahigayon og tigom uban sa mga head sa lain-laing departamento sa city hall diin gituki nila ang financial assistance nga P50 milyones.
Ang maong budget kinahanglan kining aprobahan sa konseho sa siyudad.
Si Rama kinsa presidente sa League of Cities of the Philippines nagkanayon nga mobisita siya sa sunod semana ngadto sa pipila ka mga lugar nga naapektohan sa linog aron mahibaw-an ang mahatag pa nga tabang sa siyudad.
Base sa report sa Philippine Institute of Volcanology and Seismology (Philvolcs) ,ang intensity 7 nasinati sa ibabaw nga bahin sa Bucloc ug Manabo, Abra; intensity 6 sa Vigan City, Sinait, Bantay, San Esteban, Ilocos Sur; Laoac, Pangasinan; ug Baguio City.
Intensity 5 nabatyagan sa Magsingal ug San Juan, Ilocos Sur; Alaminos City ug Labrador, Pangasinan; Bambang, Nueva Vizcaya; Mexico, Pampanga; Concepcion ug Tarlac City, Tarlac; Lungsod sa Manila; ug Malabon City.
Samtang ang intensity 4 ang niigo sa Marikina City; Quezon City; Pasig City; Valenzuela City; Lungsod sa Tabuk, Kalinga; Bautista ug Malasiqui, Pangasinan; Bayombong ug Diadi, Nueva Vizcaya; Guiguinto, Obando ug San Rafael, Bulacan; ug San Mateo, Rizal.
Base sa ulahing taho nga nadawat sa CCDRRMC, 14 ang nangamatay ug gibanabana nga P1.2 bilyones ang kadaot sa imprastraktura ang natala gumikan sa linog. —BDB (BANATNEWS)
- Latest
