Abangan sa vendors sa interim market wa mosaka

CEBU, Philippines — Giklaro sa kadagkoan sa Cebu2WorldDevelopment Inc. (C2W), developer sa modernisasyon sa Carbon Market nga dili tinuod ang nigawas nga mga istorya nga dunay pagsaka sa abangan sa vendors diha sa Interim Building.

Nasayran nga pipila ka semana nga migawas sa social media ang intriga nga dunay mga vendors nga nitayabaw human gidemolis ang ilang orihinal nga puwesto ug nagdumili nga mobalhin sa interim building gumikan kay nimahal na ang ilang abangan.

Apan suma pa sa deputy general manager sa C2W nga si Lydwena Eco nga walay kamatuoran ang maong isyu ug nagpabilin ang naandan nga abangan sa vendors nga nalatid sa market code partikular na ang P8.50 per square meter matag adlaw.

Gidugang ni Eco nga bukas ra gyud ang ilang buhatan alang sa nagkadaiyang concern sa vendors.

Pormal nga gilusad niadtong Dominggo sa gabii ang Interim Building o temporaryong area alang sa vendors nga apektado sa demolisyon nga kabahin sa modernisasyon sa merkado.

Nitambong sa maong kalihokan si Cebu City Mayor Michael Rama kinsa maoy nangulo kaniadto sa sugyot alang sa supplemental memorandum of agreement (MOA) sa joint-venture agreement (JVA) sa Carbon Public Market modernization

Atol usab sa maong adlaw, gipirmahan ni Rama ang gipasar nga supplemental MOA. Nadawat na usab sa kagamhanan ang unang hugna nga guaranteed payment nga P50 million gikan sa C2W.

Gikan sa P5.5 billion, moabot na ngadto sa P8 billion , ang magasto sa C2W sa modernisasyon sa Carbon, gumikan sa dugang development sa pipila ka bahin sa merkado.

Nalakip usab sa supplemental MOA mao ang pagbalik sa Freedom Park sa orihinal nga hitsura niini nga tipik sa pagpreserbar sa kasaysayan sa lugar. .

Nalatid usab sa supplemental MOA nga dili hilabtan ang Sitio Bato sa barangay Ermita kun wala pa'y final ug saktong relokasyon alang sa mga residente sa maong dapit. —MEL (BANAT NEWS)