“Teenage pregnancy” angayan hatagan og pagtagad suma sa POPCOM

CEBU, Philippines — Sa bag-ong datos nga gipagawas sa Commission on Population and Development Central Visayas (POPCOM VII), ang rehiyon nakatala og 12, 000 ka kaso sa  “teenage pregnancy” sa tuig 2020 nga mas ubos sa 14, 000 statistics sa tuig 2019.

Nagkanayon si Atty. Bruce Ragas, Regional Director sa POPCOM VII nga usa ang “teenage pregnancy” sa nakahatag og kontribusyon sa pagsaka sa populasyon.

Atol sa news forum nga Open Line sa MyT, gipadayag niya nga makapaalarma kini sanglit ang maong mga pangedaron nag-eskwela paman.

Sa ilang datos, ang pinakabata niini nagpangidaron og 10 anyos.

Pipila ka kaso sa “teenage pregnancy” gituohan nga biktima sa sexual abuse.

Samtang gitataw usab ni Ragas nga kasagaran sa kabatan-onan karon expose kaayo sa online world ug daku ang ikatabang sa mga ginikanan ug magtutudlo sa paghatag og giya sa kabatan-onan nga dili magpalabi sa online.

Ang pagsugyot sa Comprehensive Sex Education mahimong mapuslanon sa mga batan-on kun kini ma-integrar sa curriculum.

Dako ang pagtuo ni Ragas nga kun ma-edukar og maayo ang kabatan-onan, mahimong responsable ang ilang mga desisyon sa kinabuhi.

Subay niini, makalikay sila sa usa sa mga hagit nga ilang giatubang karon, dili lang sa illegal nga drugas, apil na sab kining hulga sa teenage pregnancy. MEL (BANATNEWS)