Kampaniya batok sa badlongong motorista pahugtan pa sa Cebu City

CEBU, Philippines — Ang lokal nga kagamhanan sa Dakbayan sa Sugbo mopahugot pa sa kampaniya batok sa mga badlongong motorista kinsa giingong pipila niini kadtong magmaneho nga ubos sa impluwensiya sa ilimnong makahubog ug drugas.

Nagtigom sa niaging adlaw ang pipila ka mga representante sa Land Transportation Office -7, Cebu-Cordova Link Expressway ug traffic enforcement units tali sa kagamhanan sa Siyudad sa Sugbo ug sa Lungsod sa Cordova.

Base sa taho sa Cebu City Transportation Office nga pipila sa gihisgotan niini mao ang Anti-Drunk and Drugged Driving Act of 2013.

Nasayran nga nahulma ang maong balaod niadtong Mayo 27, 2013 sa panahon ni kanhi Presidente Benigno Aquino III.

Ubos sa maong balaod ang mga officer makagamit og breath analyzers ug makapahigayon og field sobriety tests sa mga drayber nga ilang gituohang hubog o ubos impluwensya sa ginadiling drugas.

Kadtong masakpan nga nagmaneho nga hubog o ubos sa impluwensiya sa ginadiling drugas masilotan og tulo ka bulan nga pagkabilanggo ug makabayad og P20,000 ngadto sa P80,000 nga multa.

Ug kong adunay mga kadaot nga nahitabo sa atol sa ilang pagmaneho makabayad kini og P100,000 ngadto sa P200,000 nga multa.

Samtang P300,000 ngadto sa P500,000 nga multa kon adunay nakalas.

Sa laing bahin, giisyuhan og citation ticket sa mga sakop sa Traffic Management Unit sa  Siyudad sa Mandaue ang 31 ka motorista nga nasakpan sa akto nga nagsubay diha sa bike lane diha sa kadalanan sa Dakbayan sa Mandaue. Romeo T. Limpangog/BDB (BANATNEWS)