Cebu City mohatag og P500,000 sa Tribu Lumad Basakanon

CEBU, Philippines — Nisaad si Cebu City Mayor Michael Rama nga mohatag og P500,000 ngadto sa Tribu Lumad Basakanon human kini nakahatag og garbo sa siyudad sa international scene.

Gipahibalo kini ni Rama atol sa courtesy call sa maong grupo diha sa buhatan sa mayor niadtong Huwebes.

Ang labing bag-ong titulo nga nakuha sa Lumad Basakanon mao ang pagkapili niini  isip kampiyon sa Powerful Daegu Festival 2022 didto sa South Korea.

Nasayran nga nitabang usab ang siyudad sa maong grupo sa pagbiyahe niini ngadto sa South Korea.

Ang Tribu Lumad Basakanon nakadaog sa kinatibuk-ang premyo nga P342,000.

Base sa taho sa Cebu City Public Information Office, nimando si Rama  sa usa ka sakop sa City Protocol Office nga pahibaw-on si Konsehal Donaldo “Dondon” Hontiveros, kinsa maoy chairman sa committee on tourism sa city council sa pagtrabaho sa mga dokumento nga gikinahanglan alang sa paghatag sa P500,000.

Sa iyang bahin, si Barangay Kapitan Norman Navarro sa Basak San Nicolas nipadayag sa iyang pasalamat sa kagamhanan sa siyudad.

“Gusto lang mi mo-extend sa among pasalamat niya (Mayor Rama) ug sa city council sa ilang pagsuporta namo didto sa Daegu. Kay kong wala sila dili ni mahitabo nga nidaog mi didto, kay sila may nangita’g paagi nga makaadto gyud mi”, butyag ni Navarro.

Gipakita sa Tribu Lumad Basakanon ang ang  ka-hugyaw sa Sinulog atol sa kompetisyon nga niresulta sa kadaogan niini. BDB (BANATNEWS)