4-anyos nga bata patay sa dengue

CEBU, Philippines — Usa ka 4- anyos nga batang babaye na usab ang namatay gumikan sa sakit dengue sa Dakbayan sa Talisay. Ang biktima nagpuyo luyo sa barangay hall sa barangay Biasong.

Si Dr. Lino Alanzado, pangulo sa City Health Office miingon nga unta ang mga ginikanan moreport dayon sa kahimtang sa ilang mga anak bisan pa og unang adlaw pa lang kini sa hilanat.

Matud pa ni Alanzado nga ang pinuy-anan sa bata nga namatay 30 ka tikang lang diha sa ilang health center.

Ang Talisay adunay 360 ka kaso sa dengue karong tuiga nga maoy nakapa numero uno niini sa tibuok probinsya sa Sugbo.

Matud pa ni Alanzado nga upat na ka kinabuhi ang nakalas sa maong sakit.

Ang ilang pag misting gidoble diha sa barangay Biasong nga maoy adunay daghan nga kaso sa dengue.

Dugang pa ni Alanzado nga kung adunay mamatikdan nga hilanat di na gyud kini padugayon pa ug ilahos na sa doktor.— IBM (BANATNEWS)