Holganza: Unahon ang pag-edukar sa mga motorist
CEBU, Philippines — Unahon una ang lapad nga pag-edukar sa mga motorista sa dili pa ipatuman ang "contactless apprehension" alang sa mga traffic violators.
Kini maoy gibutyag sa chairman sa Cebu City Traffic Operation Management Board nga si Atty. Rico “Koko” Rey Francis Holganza kinsa nipadayag nga hatagan og igong panahon ang transisyon alang sa maong plano.
“Yes, usa na sa gi-target g’yod nga projects ni Mayor Michael Rama nga contactless apprehension, pero sa akong personal nga opinyon nga at this time, mo-prefer ko nga kanang personal usa nga dakop,” matud pa niya atol sa online forum sa MyTv.
Gitataw ni Holganza nga ang pag-edukar sa mga motorista maoy una nga buhaton karong panahona.
Apil usab sa angayang unahon mao ang pag-ayo sa mga traffic signs ug nagpadayon pa usab ang pag-instalar sa mga kamera busa unahon lang una ang lapad nga pisikal nga pagpanakop sa violators.
“Ang kulba man gud aning contactless, if you implement it right away, based on my personal opinion ko lang ni, I am not saying it is the opinion of the board. Sa panahon nga mag- register or mag renew sa imong license, makit-an nalang nimo nga hala, ang imo diay’ng penalty, muabot na og tag P50,000 kay pila na ka violations imong nahimo, without you even knowing na naka violate diay ka,” segun pa ni Holganza. — MEL (BANATNEWS)
- Latest
