CAD: Produktong agrikultura wa maapektuhi sa mga pag-uwan

CEBU, Philippines — Gipahibalo sa Cebu City Agriculture Department (CAD) nga walay kadaot sa agrikultura ang mga pag-ulan nga nasinati sa nilabay na mga adlaw.

Matud pa sa head sa CAD nga si Joelito L. Baclayon nga regular ang paghimo nila og monitoring. “So far, there’s no report gikan sa amoang farmers nga naay mga damages. Although, nagsige mi ron og monitor, ilabi na kung mu-prolong gyud ning atoang weather ba,” suma pa ni Baclayon.

Nasinati ang panagsang pag-uwan ug kusog nga pag-uwan sa dakbayan sa Sugbo sa pipila ka adlaw tungod sa Southwest Monsoon o “Habagat,” nga maoy kasamtangang sistema sa panahon sa nasud.

“Kung adunay mga panghitabo o bisan unsang mga insidente nga makadaot sa produksiyon sa agrikultura, awtomatik mahatagan og pinansyal nga tabang ang atong mga mag-uuma alang sa ilang nadaot nga mga produkto,” dugang pa ni Baclayon.

Ang mga utanon ang labing apektado kun adunay mahitabo nga kalamidad tungod kay kini sensitibo kaayo. Gisundan kini sa mga punoan sa prutas nga nag-una sa mga dagkong tanom sama sa saging, lubi ug mangga. Sa laing bahin , gipadayon na usab sa miaging adlaw  ang dugang hugna sa pag-apod apod og financial aid sa mga mag-uuma nga naapektuhan sa bagyong Odette ug uban pang mga nangaging kalamidad nga nakahatag og dakong kadaot sa ilang mga produkto sa agrikultura.

Nasayran nga dugang P400, 000 ang na-release sa kagamhanan alang sa maong katuyoan. — UV Intern/MEL (BANAT NEWS)