Kagubot sa mga batan-on nakapurwisyo sa mga residente

CEBU, Philippines — Grupo sa mga batan-on nga maglinabayay og botelya panahon sa kagabhion nakahatag ug dakung purwisyo diha sa barangay San Nicolas Proper apil na sa silingang barangay.

Sa video nga gi-post ni Kapitan Clifford Niñal sa iyang Facebook account  ang maong mga batan-on nag-abot sa may dalan Lakandula nga sakop sa barangay San Nicolas Proper ug didto nagbinatoay og botelya.

Suma pa ni kapitan Niñal nga matag gabii magpabadlong ang grupo sa mga batan-on ug nakadawat sila og reklamo gikan sa mga residente.

Ang gihimo karon sa barangay San Nicolas Proper mao ang pagbantay sa maong mga batan-on pinaagi sa pagpatrolya.

Hinoon matud ni kapitan Niñal nga nakasinate usab sila og kalisdanan sa pagbadlong sa maong mga menor de edad tungod kay nigara kini pag-ayo tungod kay sila moingon nga dili mahimong dakpon.

Sa duha ka adlaw nila nga pagpatrolya dunay usa ka taga Ermita ang ilang nasakpan apan wala nila ma-hold tungod kay kini menor de edad.

“Ang move namo ani among gihimo karon two days na namo gibantayan ning mga bataa so kung makit-an mi managan so mao na among gihimo ron kani laging kuhaan ta og fuel allocation so nindot to saona wala pa kuhae ang allocation maka-roving man mi og tarong karon apiki na so dili na gyud pirminti magtuyok-tuyok ba, amo nalang himoon inig kagabii” segun pa ni Kapitan Niñal.

Dugang sa kapitan nga delikado ang maong buhat sa mga batan-on nga posibleng maka among na hinoon sa mga mangagi sa kadalanan. — /MEL (BANAT NEWS)