Beneficiary sa CHAMP nga adunay LOA padiretsohon sa tambalanan

CEBU, Philippines — Giawhag sa City Hospitalization Assistance and Medicines Program (CHAMP) ang ilang beneficiaries kinsa nakadawat sa ilang Letter of Authority (LOA) nga mo deretso diha sa mga tambalanan.

Base sa taho sa Public Information Office (PIO) sa siyudad nga ang pangulo sa CHAMP Jojo Lingaolingao nipahinumdom sa mga pasyente aron dili sila mapugos sa paggasto sa ilang kaugalingong kwarta sa higayon nga magpa-admit kini.

Matud ni Lingaolingao nga adunay pipila ka mga tambalanan nga dili modawat sa ilang LOA hinungdan nga adunay mga pasyente nga napugos sa pagbayad gikan sa ilang kaugalingon nga bulsa ug makuha ra ang refund gikan sa CHAMP sa lain pa nga mga adlaw.

Niadtong Miyerkules, ang CHAMP nag-apod-apod og refund ngadto sa 75 ka beneficiaries kinsa nakasinati sa maong sitwasyon.

Giklaro ni Lingaolingao nga kon magpatambal sa mga tambalanan nga modawat sa LOA sa CHAMP, ang mga pasyente dili na kinahanglang mobayad gawas sa professional fee sa mga doktor nga dili sakop sa ilang buhatan.

Lakip sa maong mga tambalanan mao ang Chong Hua Hospital, St. Vincent General Hospital, Ace Medical Center-Cebu, ug Sacred Heart Hospital. Ug kong ang usa ka beneficiary walay igong kantidad sa kwarta ug dinalian ang pagpatambal kinahanglan nga mo deretso sila sa hospital nga kauban sa CHAMP.

Apan si Lingaolingao nagkanayon nga kong adunay mga higayon nga dili sila ma-accommodate tungod sa kanihit sa mga lawak ug uban pang mga rason ug ang pasyente kinahanglan nga dad-on sa hospital sa laing siyudad kinahanglang tipigan ang resibo ug kinahanglang rehistrado kini sa Cebu City alang sa reimbursement. — (/BDB) (BANAT NEWS)