Tabo sa Banay parehas sa makita sa Singapore
CEBU, Philippines — Tabo sa Banay diha sa downtown Cebu City paninduton sama sa sikat nga food street o food avenues sa nasud sa Singapore, Malaysia ug Hong Kong.
Apan una pa kini mahitabo kinahanglang unahon sa siyudad paglimpyo ang palibot aning maong dapita tungod kay sa pagkakaron hugaw kaayo ang mga stalls sa lugar ug kinahanglang dunay dakong kausaban nga himuon aron presentable sa mga buot mangaon.
Si Mayor Michael Rama mimando sa Garbo Asenso Sumbanan Alyansa (GASA) nga himuong “hawker center” ang “Tabo sa Banay.”
Ang hawker center o cooked food center usa ka open-air complex susama sa makita sa Hong Kong, Malaysia, ug Singapore.
Paborito kining adtuon sa mga lokal ug turista nga gustong makakaon og nagkalain-laing putahi, tradisyonal ug international apan barato ang presyo.
Para kini sa tanang namaligya og mga pagkaon apil niini ang mga trisikad ug karumata.
Sa taho sa Public Information Office (PIO) sa dakbayan, gibutyag ni GASA Head Veronica Jimenez nga gisugdan na nila ang cleaning operation niadtong Huwebes.
Ilang gilimpyohan ang kapin sa 20 ka mga stalls sa Tabo sa Banay ingon man ang kasikbit niini nga mga lugar.
“Our first step is to clean their stalls, because it's been a long time, since there have been a lot of eyesores like garbage. That is why we are working together to achieve the Singapore-like (city) dream of the mayor,” suma pa ni Jimenez.
Kini nga kalihokan gihimo uban sa mga personnel sa Prevention Restoration Order Beautification Enhancement (PROBE) Team, Cebu City Market Office, ug sa Cebu Environmental Sanitation and Enforcement Team (CESET).
Matud ni Jimenez nga gikatakdang makigtagbo siya sa ubang miyembro sa GASA Board aron hisgutan pa ang plano sa Tabo sa Banay.
Ang PROBE pinangulohan ni Jonathan Villas nipahigayon sab og mga tigom sa asosasyon sa mga vendor ug gipahibawo kini sa plano sa siyudad alang sa maong lugar.
"Eventually, we will be able to achieve what our mayor wants because we will also see that they (people) are also helping and they are also interested in our plans… as long as we really work together," niya pa. —/IBM (BANAT NEWS)
- Latest
